ബിഗ് ബ്രദറിന് വമ്പന്‍ ബുക്കിംഗ്! ആകാംഷയില്‍ ആരാധകര്‍

നാളേറെയായി ആരാധകര്‍ കാത്തിരിക്കുന്ന മോഹന്‍ലാല്‍ നായകനായെത്തുന്ന ചിത്രമാണ് ബിഗ് ബ്രദര്‍. ജനുവരി 16ന് വേള്‍ഡ് വൈഡായി റിലീസ് ചെയ്യാനൊരുങ്ങുന്ന ചിത്രത്തിന്റെ പോസ്റ്ററുകളും ഗാനങ്ങളും ട്രെയ്‌ലറുകളും ഇതിനോടകം തന്നെ പ്രേക്ഷക ശ്രദ്ധ നേടിയിരുന്നു. ദിവസങ്ങള്‍ക്ക് മുമ്പ് പുറത്തിറങ്ങിയ ഈ ചിത്രത്തിലെ രണ്ടാമത്തെ ട്രെയ്‌ലറും ചുണ്ടില്‍ തത്തും കവിതേ എന്ന് തുടങ്ങുന്ന ഗാനവുമൊക്കെ ട്രെന്‍ഡിംഗ് ലിസ്റ്റില്‍ ഇടംപിടിച്ചിരുന്നു. റിലീസിന് ഇനി ദിവസങ്ങള്‍ മാത്രം ബാക്കി നില്‍ക്കെ ചിത്രത്തിന്റെ ഓണ്‍ലൈന്‍ ബുക്കിംഗ് പൊടിപൊടിക്കുകയാണ്. കഴിഞ്ഞ ദിവസം മുതല്‍ക്കാണ് ചിത്രത്തിന്റെ ഓണ്‍ലൈന്‍ ബുക്കിംഗ് ആരംഭിച്ചത്. ഓണ്‍ലൈന്‍ ബുക്കിംഗ് ആരംഭിച്ച് മണിക്കൂറുകള്‍ പിന്നിടുമ്പോള്‍ വമ്പന്‍ ബുക്കിംഗാണ് ചിത്രത്തിന് ലഭിച്ചിരിക്കുന്നത്.

നേരത്തെ ചിത്രത്തിലെ ഫാന്‍ മെയ്ഡ് പോസ്റ്ററും പുറത്തിറങ്ങിയിരുന്നു. ഫാന്‍ മെയ്ഡ് പോസ്റ്ററിനും ഗംഭീര സ്വീകരണമായിരുന്നു. കലിപ്പ് ലുക്കിലുള്ള മോഹന്‍ലാലിന്റെ പോസ്റ്ററാണ് പുറത്തിറങ്ങിയത്. പതിവ് സിദ്ദിഖ് ചിത്രങ്ങളെ പോലെ ഒരു കോമഡി എന്റര്‍ടൈന്മെന്റ് മൂവി ആയിരിക്കില്ല ഈ സിദ്ദിഖ് ചിത്രം. പകരം ആക്ഷന് പ്രാധാന്യം നല്‍കിയാണ് ചിത്രം ഒരുക്കിയിരിക്കുന്നത്. അഞ്ച് ആക്ഷന്‍ രംഗങ്ങളാണ് ചിത്രത്തിലുള്ളത്. ആക്ഷനും ത്രില്ലറും കോമഡിയും എല്ലാം ചേര്‍ന്ന ഒരു കംപ്ലീറ്റ് ഫാമിലി എന്റെര്‍റ്റൈനെര്‍ ആയാവും ചിത്രം തിയേറ്ററുകളിലെത്തുക. 32 കോടി മുതല്‍ മുടക്കിലുള്ള ചിത്രമെന്നാണ് സംവിധായകന്‍ സിദ്ദിഖ് വ്യക്തമാക്കിയത്. മോഹന്‍ലാല്‍ സച്ചിദാനന്ദന്‍ എന്ന കഥാപാത്രത്തെയാണ് ചിത്രത്തില്‍ അവതരിപ്പിക്കുന്നത്. പുതുമുഖമായ മിര്‍ണ മേനോനാണ് ചിത്രത്തില്‍ നായികയായെത്തുന്നത്.

ടിനി ടോം, അനൂപ് മേനോന്‍, ദേവന്‍, വിഷ്ണു ഉണ്ണികൃഷ്ണന്‍, അബ്ബാസ് ഖാന്‍, സിദ്ധിഖ്, ചെമ്പന്‍ വിനോദ്, ഹണി റോസ് എന്നിവരാണ് ചിത്രത്തിലെ മറ്റ് താരങ്ങള്‍. മോഹന്‍ലാലിന്റെ സഹോദരനായാണ് ചിത്രത്തില്‍ അനൂപ് മേനോന്‍ എത്തുന്നത്. ഫിലിപ്പോസ് കെ.ജോസഫ്, മനു മാളിയേക്കല്‍, ജെന്‍സോ ജോസ്, വൈശാഖ് രാജന്‍ എന്നിവര്‍ക്കൊപ്പം സിദ്ധിഖും ചേര്‍ന്ന് നിര്‍മ്മിക്കുന്ന ചിത്രം കൂടിയാണിത്. ചിത്രത്തിലെ ഒരു ആക്ഷന്‍ രംഗം ഏറെ സമയമെടുത്ത് വലിയ ചെലവിലാണ് ഒരുക്കിയതെന്നും റിപ്പോര്‍ട്ടുണ്ട്. കാര്‍ണിവല്‍ സിനിമാസും അവസാന ഘട്ടത്തില്‍ നിര്‍മ്മാണത്തെ പിന്തുണച്ചുവെന്നും ഓവര്‍സീസ് റൈറ്റ്‌സ് സ്വന്തമാക്കിയെന്നും സൂചനയുണ്ട്. ജിത്തു ദാമോധറാണ് ചിത്രത്തിന് വേണ്ടി ക്യാമറ ചലിപ്പിച്ചിരിയ്ക്കുന്നത്. 2018 ലാണ് സിദ്ദിഖ് ബിഗ് ബ്രദര്‍ എന്ന ചിത്രത്തെ കുറിച്ച് സൂചന നല്‍കിയത്. രണ്ട് വര്‍ഷം കൊണ്ട് സിനിമ പൂര്‍ത്തിയാക്കി 2020 ജനുവരിയില്‍ സിനിമ റിലീസ് ചെയ്യുമെന്നാണ് പ്രതീക്ഷ.

Leave comment

Your email address will not be published. Required fields are marked with *.