എന്റെ മോദി, താങ്കളില്‍ നിന്ന് ഞാന്‍ ഇത് ഇപ്പോള്‍ പ്രതീക്ഷിച്ചില്ല: ബാലചന്ദ്ര മേനോന്‍..

0

Image result for balachandra menon and modi

 

 

മോദി, നിങ്ങളിൽ നിന്ന് ഇത് പ്രതീക്ഷിച്ചില്ലെന്ന് നടൻ ബാലചന്ദ്ര മേനോൻ. തൻ്റെ ഫേസ്‍‍ബുക്കിൽ കുറിച്ച കുറിപ്പിലൂടെയാണ് ബാലചന്ദ്ര മേനോന്‍ മോദിയോട് സരസമായി സംവദിച്ചത്. നടനും സംവിധായകനുമായ ബാലചന്ദ്ര മേനോന്‍ ഒരു യൂട്യൂബ് ചാനല്‍ തുടങ്ങുന്നതിൻ്റെ ഒരുക്കത്തിലാണ്. ഇതിലൂടെ എല്ലാ വെള്ളിയാഴ്ചയും ഫിലിമി ഫ്രൈഡേയ്‌സ് എന്ന പേരില്‍ ഒരു ഷോ ചെയ്യുമെന്നും ബാലചന്ദ്ര മേനോന്‍ മുൻപ് വ്യക്തമാക്കിയിരുന്നു. അങ്ങനെയിരിക്കുമ്പോഴാണ് പ്രധാനമന്ത്രി നരേന്ദ്രമോദിയും ഒരു യൂട്യൂബ് ചാനല്‍ തുടങ്ങാന്‍ പോകുകയാണെന്ന വാര്‍ത്ത പുറത്തുവരുന്നത്. അതിന് ബാലചന്ദ്ര മേനോനും നരേന്ദ്രമോദിയും തമ്മില്‍ എന്തു ബന്ധം? ആ ചോദ്യത്തിനുള്ള ഉത്തരം ബാലചന്ദ്ര മേനോന്‍ തന്നെ നല്‍കുകയാണ്. നാല് പതിറ്റാണ്ടുകള്‍ നീണ്ട സിനിമാ ജീവിതത്തിലെ ചില രസകരമായ സംഭവങ്ങള്‍ പങ്കുവെച്ചാണ് അദ്ദേഹം അവസാനം മോദിയില്‍ എത്തുന്നത്.

 

 

 

Image result for balachandra menon and modi

ബാലചന്ദ്ര മേനോൻ്റെ ഫേസ്‍‍ബുക്ക് കുറിപ്പിൻ്റെ പൂര്‍ണ രൂപം കാണാം

ഇത് വെറും തമാശയാണ് …എന്ന് പറഞ്ഞാല്‍ വെറും തമാശ .’ ഈ കുറിപ്പിൻ്റെ പിന്നില്‍ എന്തെങ്കിലും ‘ഗൂഢാലോചന’ ഉണ്ടെന്നോ ഞാന്‍ ഒരു ‘ പുകവലയം ‘ സൃഷ്ട്ടിക്കുകയാണെന്നെന്നൊന്നും ദയവായി കാട് കയറി ചിന്തിക്കരുതെന്നു പ്രത്യേക മുന്നറിയിപ്പ് . എൻ്റെ തലേലെഴുത്തിനെ പറ്റിയാണ് പറയാന്‍ പോകുന്നത് …

എല്ലാര്‍ക്കുമുള്ളതു പോലെ എനിക്കും ഒരു ജാതകം ഉണ്ടല്ലോ . അത് സംബന്ധിച്ച ഒരു ചുഴിക്കുറ്റമാണ് എനിക്ക് പറയാനുള്ളത്. നിങ്ങള്‍ കരുതും മോദിയറുടെ ഒരു പടം ഇട്ടേച്ചുംവെച്ചു ഇങ്ങേരെന്നതാ ഈ ‘വളുവളാന്നു’ പറഞ്ഞോണ്ടിരിക്കുന്നതു എന്ന് ..

പറയാം മാഷേ …ഇച്ചിരി ക്ഷമീര് ..

എണ്‍പതുകളില്‍ ഞാന്‍ ‘ പ്രേമഗീതങ്ങള്‍’ . എന്ന എൻ്റെ ആദ്യത്തെ സമ്പൂര്‍ണ്ണ കാംപസ് ചിത്രം റിലീസ് ചെയ്തു. അതിനു ഒപ്പം ഭാഗ്യരാജിൻ്റെ ‘മൗനഗീതങ്ങള്‍ ‘ എന്ന തമിഴ് ചിത്രവും തിയേറ്ററുകളില്‍ എത്തി. വല്ല കാര്യവുമുണ്ടോ ? പ്രേമഗീതനകളും മൗന ഗീതങ്ങളും ഒരുമിച്ചു വന്നപ്പോള്‍ എന്തോ ഒരു ഇത് . അതൊക്കെ ശരി സമ്മതിച്ചു …മോദിക്കും ഇതിനും തമ്മില്‍ എന്ത് ബന്ധം എന്ന് പറ . ”ശടാ…. നിങ്ങള്‍ തോക്കില്‍ കേറി വെടി വെക്കല്ലപ്പാ .. ..ഞാന്‍ പറയാം ‘
‘എന്നാ പറ ‘..
.
1982 ല്‍ ഞാന്‍ . ‘ഇത്തിരി നേരം ഒത്തിരി കാര്യം’ എന്ന പേരില്‍ ബുദ്ധിമാന്ദ്യം അനുഭവിക്കുന്ന കുറെ കഥാപാത്രങ്ങളെ അടിസ്ഥാനമാക്കി ഒരു ചിത്രം പുറത്തിറക്കി . 1986 ആയപ്പോള്‍ ഏതാണ്ട് അതേ പശ്ചാത്തലത്തില്‍ ‘ താളവട്ടം ‘എന്നൊരു സിനിമ പ്രിയന്‍ സംവിധാനം ചെയ്തു ..

1985 ല്‍ ഞാന്‍ കാര്‍ത്തിക എന്ന നടിയെ മലയാളിക്ക് പരിചയപ്പെടുത്തിക്കൊണ്ടു ‘ മണിച്ചെപ്പു തുറന്നപ്പോള്‍ ‘ എന്നൊരു സിനിമ തയ്യാറാക്കി . കാര്‍ത്തികയുടെ ഭര്‍ത്താവായി അഭിനയിക്കേണ്ട വേഷമായിരുന്നു എൻ്റേത് . 1988 ആയപ്പോള്‍ മോഹന്‍ലാല്‍ ഭര്‍ത്താവായി അഭിനയിച്ചുള്ള ‘ചിത്രം’ പുറത്തു വന്നു . നായിക രഞ്ജിനി .. സംവിധാനം വീണ്ടും പ്രിയന്‍. 1993 ല്‍ ആനിയെ നായികയാക്കിയുള്ള എൻ്റെ ചിത്രം . ‘അമ്മയാണെ സത്യം ‘ പുറത്തു വന്നു . ആനി ആണ്‍ വേഷത്തില്‍ വന്നു എന്നതായിരുന്നു ആ പ്രേക്ഷകര്‍ ആ പടത്തെ നെഞ്ചിലേറ്റാന്‍ കാരണം
.
2005 ആയപ്പോള്‍ ദേണ്ടേ വരുന്നു ‘രസതന്ത്രം ‘എന്ന സത്യന്‍ അന്തിക്കാട് ചിത്രം .ആനിക്കു പകരം മീര ജാസ്മിന്‍ ആണ്‍ വേഷം കെട്ടി പ്രേക്ഷരെ സന്തോഷിപ്പിച്ചു . ‘അമ്മയാണെ സത്യത്തില്‍’ മുകേഷ് ചെയ്തത് മോഹന്‍ലാല്‍ ”രസതന്ത്രത്തില്‍ ‘വെടിപ്പാക്കി
‘അതൊക്കെ ഞങ്ങള്‍ക്കറിയാവുന്ന കാര്യമാ …ഇനിയെങ്കിലും പറ മോദിക്കിവിടെ എന്താ കാര്യമെന്ന് ? എന്ത് തെറ്റാണ് അദ്ദേഹം നിങ്ങളോടു ചെയ്തത് ?’

എന്നതാണെന്നോ ? ഭയങ്കര ‘ചെയ്ത്തല്ലേ’ എനിക്കിട്ടു ചെയ്തത് . ഞാന്‍ ‘filmy FRIDAYS ‘ എന്ന പേരില്‍ എന്റെ യൂ ട്യൂബില്‍ ഒരു പുതിയ പ്രോഗ്രാം തുടങ്ങാന്‍ പോവുകയാണ് . എൻ്റെ ഇന്നിത് വരെയുള്ള സിനിമ ജീവിതത്തിൻ്റെ ഒരു ദൃശ്യാവിഷ്‌ക്കാരമാണ് സംഗതി പ്രാരംഭ പണികളൊക്കെ കഴിഞ്ഞു . വരുന്ന ഏപ്രില്‍ 12 മുതല്‍ എല്ലാ വെള്ളിയാഴ്ചകളിലും വൈകിട്ട് 7 മണിക്ക് ഞാന്‍ നിങ്ങളോടൊപ്പമുണ്ടാവും. അപ്പോഴാണ് മോഡി യൂ ട്യൂബ് തുടങ്ങുന്നു എന്ന വാര്‍ത്ത ഞാന്‍ വായിക്കുന്നത് .

ഇനി പറ .. ഞാന്‍ ‘ വളവളാ’ പറഞ്ഞോണ്ടിരുന്നതിൻ്റെ കാരണം ഇപ്പം മനസ്സിലായോ?

എന്നാലും പ്രിയപ്പെട്ട മോദി …സിനിമയില്‍ ഈ അനുഭവം ഒരുപാട് എനിക്കുണ്ടായിട്ടുണ്ട് . പക്ഷെ താങ്കളില്‍ നിന്ന് ഇങ്ങനെ ഒന്ന് , അതും ഈ തെരഞ്ഞെടുപ്പു വേളയില്‍, ഞാന്‍ സ്വപ്നത്തില്‍ പോലും പ്രതീക്ഷിച്ചതല്ല . എനിക്ക് മനസ്സിലാകാത്തത് എൻ്റെ യു ട്യൂബ് കാര്യം ആര് അദ്ദേഹത്തോട് പറഞ്ഞു എന്നാണു. എന്തായാലും ഞാന്‍ പിന്നോട്ടില്ല ഏപ്രില്‍ 12 ന് തന്നെ എൻ്റെ വള്ളം ഇറക്കും . അല്ലെങ്കിത്തന്നെ എൻ്റെ ഫേസ്ബുക്ക് മിത്രങ്ങള്‍ ഉള്ളപ്പോള്‍ ഞാന്‍ എന്തിനു മടിക്കണം ?മറക്കല്ലേ ; ഏപ്രില്‍ 12 വെള്ളിയാഴ്ച വൈകിട്ട് കൃത്യം 7 മണി.

You might also like