മലയാളസിനിമ ഇയിടെ ചര്‍ച്ച ചെയ്യുന്ന ഒരു പേരാണ് ‘മാമാങ്കം’. സംവിധായകനെ മാറ്റിയെന്ന വാര്‍ത്തയും ചിത്രത്തില്‍ നിന്ന് നടന്‍ ധ്രുവനെ ഒഴിവാക്കി പകരക്കാരനായി ഉണ്ണി മുകുന്ദനെ കാസ്റ്റ് ചെയ്ത വാര്‍ത്തയും ഏറെ ചര്‍ച്ചയെയ്ത വിഷയങ്ങളാണ്. ചിത്രത്തിനായി ധ്രുവന്‍ കഠിനമായ പരിശ്രമത്തിലൂടെ കായികാഭ്യാസിയുടെ ശരീരം സ്വന്തമാക്കിയ ചിത്രം ആരും പെട്ടെന്ന് മറക്കാനിടയില്ല.
ഏവരെയും ഞെട്ടിച്ച് ചിത്രത്തില്‍ നിന്ന് താരത്തെ പുറത്താക്കിയത് വലിയ വാര്‍ത്തയായി മാറി. ചിത്രം ഇപ്പോള്‍ ഷൂട്ടിങ്ങിന്റെ മൂന്നാം ഘട്ടത്തിലേക്ക് കടന്നിരിക്കുകയാണ്. കഴിഞ്ഞ ദിവസം ചിത്രത്തില്‍ യുവനടി അനു സിതാരയും ജോയിന്‍ ചെയ്തിരുന്നു.
തന്റെ ഈ വര്‍ഷത്തെ രണ്ടു പ്രധാന ചിത്രങ്ങളില്‍ ഒന്നാണ് ചോക്ലേറ്റും മാമാങ്കവുമെന്ന് ഉണ്ണി മുകുന്ദന്‍ മുന്‍പ് വ്യക്തമാക്കിയിരുന്നു. ഇപ്പോള്‍ മാമാങ്കത്തിനായുള്ള തന്റെ കഥാപാത്രത്തിന് വേണ്ടി കഠിനമായ കായികാധ്വാനത്തില്‍ ഏര്‍പ്പെട്ടിരിക്കുകയാണ് ഉണ്ണി മുകുന്ദന്‍. മെയ്യഭ്യാസിയുടെ ശാരീരിക കരുത്ത് പ്രകടമാക്കുന്ന തരത്തിലുള്ള വേഷമായിരിക്കും ഉണ്ണി മുകുന്ദന്‍ ചിത്രത്തില്‍ അവതരിപ്പിക്കുക.
എം പത്മകുമാറാണ് ചിത്രം ഇപ്പോള്‍ സംവിധാനം ചെയ്യുന്നത്. മുന്‍പ് സജീവ് പിള്ളയായിരുന്നു ചിത്ത്രതിന്റെ സംവിധാനം ചെയ്തിരുന്നത്. സംവിധായകനെ പുറത്താക്കിയ ശേഷം എം പത്മകുമാറിനെയാണ് ഈ ദൗത്യം ഏല്‍പ്പിച്ചിരിക്കുന്നത്.
